Kuri uyu wa kabiri tariki ya 05/06/2018, Meya Mbonyumuvunyi Radjab uyobora akarere ka Rwamagana ari kumwe n’abahagarariye inzego z’umutekano zikorera muri aka karere bifatanyije n’abaturage bo mu kagari ka Nsinda, umurenge wa Muhazi,  mu nteko rusange yabereye mu mudugudu wa Rubirizi. Muri iyi nteko, abayobozi bakaba bakemuye mu ruhame ibibazo bitandukanye bagejejweho n’abaturage. Aka kagari kabereyemo iyi nteko, kakaba karimo no kubakwamo ivuriro ry’ingoboka ku bufatanye bw’ingabo z’igihugu (RDF), Ubuyobozi bw’Akarere ndetse n’abaturage. 

Muri iyi nteko kandi, Bwana Butera Laurent uhagarariye ikigo cy’igihugu gishinzwe gukwirakwiza ingufu z’amashanyarazi (REG) mu karere ka Rwamagana yabwiye abaturage ko leta yaborohereje uburyo bwo kubona amashanyarazi kuko bayagezwaho ku buntu hanyuma bakagenda bishyura ifatabuguzi uko baguze umuriro. Bwana Butera Laurent yabwiye abaturage ko ntawemerewe kubuza umuturanyi we gufatira umuriro ku ipoto runaka kuko ibikoresho by’amashanyarazi byose bigenzurwa n’i ikigo cy’igihugu gishinzwe gukwirakwiza ingufu z’amashanyarazi (REG), ndetse anabasaba kujya bamenyesha iki kigo igihe babonye umuntu wese ucokoza ibikoresho by’amashanyarazi Atari umukozi wacyo.

Nyuma yo kubwirwa n’abaturage ko hari abagabo bahohoterwa n’abagore bikarangira hahanwe abagabo kuko abagore aribo bageza ibirego byabo byabo kuri Polisi y’igihugu mbere, Meya Mbonyumuvunyi Radjab yibukije aba baturage ko buri wese afite uburenganzira bwo kugeza ikibazo cye ku buyobozi bumwegereye cyangwa kuri Polisi kuko ubutabera n’ubuyobozi bushingira ku bimenyetso buhabwa n’ababugana kandi uwitabaje ubuyobozi wese buramutabara. Meya Mbonyumuvunyi yakomeje ashishikariza abaturage kujya batanga amakuru igihe cyose babonye ahari ikibazo cyangwa se imiryango ibana mu makimbirane. Umuyobozi w’Akarere, yasoje ashimira ingabo z’igihugu uburyo zirimo gufasha abaturage batuye mu kagari ka Nsinda mu gikorwa cyo kubaka ivuriro ry’ingoboka (Health Post) ndetse ashimira n’abaturage uruhare babigiramo. Meya Mbonyumuvunyi yanasabye abaturage kwihutira gutanga umusanzu w’ubwisungane mu kwivuza kugira ngo bazabashe kwivuza mu mwaka wa 2018/2019.

Nyuma y’iyi nteko rusange y’abaturage, Meya Mbonyumuvunyi ari kumwe n’abahagarariye inzego z’umutekano, bakaba basuye ahari kubakwa ivuriro ry’ingoboka mu rwego rwo kureba aho imirimo igeze. Bikaba biteganyijwe ko iri vuriro rigomba kuba ryuzuye bitarenze tariki ya 30/06/2018.