Muri gahunda y'ubwishingizi bw'ibihingwa n'amatungo, kuri uyu wa 09 Ukwakira 2024 Umunyamabanga wa Leta muri Minisiteri y’ubuhinzi n’ubworozi, Eric Rwigamba na Guverineri w’Intara y’Iburasirazuba bifatanyije n'Ubuyobozi bwa BK Insurance n’Akarere ka Rwamagana mu gikorwa cyo gushumbusha abahinzi n'aborozi bahuye n'ibiza mu gihembwe 2024B bishingiwe.

Mu gihembwe cy'ihinga 2024B abahinzi bibumbiye mu makoperative y'abahinzi b'umuceri akorera mu gishanga cy'umuceri cya cyaruhogo bagize ibibazo bikomoka ku mvura yarengeye umuceri bari bahinze barawishingiye muri gahunda y’ubwishingizi bw’ibihingwa n’amatungo ari na yo mpamvu bashumbushwe FRW 26,720,000. Ku rundi ruhande aborozi b'inka z'umukamo mu Karere ka Rwamagana bashumbushwe agera ku FRW 10,913,167 ku nka bari barishingiye muri BK Insurance. Muri gahunda y'ubwishingizi bw'ibihingwa n'amatungo, izwi nka "Tekana Urishingiwe Muhinzi-Mworozi".

Umunyamabanga wa Leta muri Minisiteri y’ubuhinzi n’ubworozi, Bwana Eric Rwigamba: "Kuba hari abamaze kwishingira ibihingwa n'amatungo bigaragaza urwego abanyarwanda tugezeho mu guteganya ibidufitiye akamaro.Ndashimira abamaze kumva iyi gahunda, ibigo by'ubwishingizi na leta yashyuzeho iyi gahunda ikunganira abahinzi n'aborozi mu bwishingizi. Uru rugendo rwo guteza imbere ubuhinzi n'ubworozi tugomba kurugendanamo kandi ubufatanye ni bwo buzadufasha kugera ku iterambere twifuza. Muri iki gihembwe ube umukoro gushishikariza abandi banyarwanda guteganyiriza ibibazo byabaho bitabaturutseho mu buhinzi n'ubworozi."

Mu rwego rwo gushyira mu bikorwa gahunda ya Guverinoma y’imyaka irindwi na Gahunda ya 4 yo kuvugurura ubuhinzi n’ubworozi (PSTA4), Leta y’u Rwanda ibinyujije muri Minisiteri y’ubuhinzi n’ubworozi ishyira mu bikorwa gahunda y’ubwishingizi bw’ibihingwa n’amatungo. Iyi gahunda yatangijwe ku mugaragaro kuwa 23 Mata 2019, ikaba kugeza ubu ikorera mu turere twose tw’Igihugu.

Kugeza ubu, iyi gahunda ikora ku bihingwa birimo umuceri, ibigori, imiteja, urusenda, ibirayi, imyumbati, soya n’ibishyimbo naho ku matungo ikora ku nka , inkoko, amafi ndetse n’ingurube.

Kuva iyi gahunda yatangira;Abahinzi b’ibihingwa 568,563 (337,422 abagabo & 231,141 abagore) babonye ubwishingizi bunganiwe na Leta muri gahunda ya ’’ Tekana Urishingiwe Muhinzi Mworozi’’, Aborozi 85,398 (72,131 abagabo & 13,267 abagore) babonye ubwishingizi bunganiwe na Leta muri gahunda ’’ Tekana Urishingiwe Muhinzi Mworozi’. FRW 4,911,899543 ni yo amaze gushumbushwa abahinzi bn’aborozi (abahinzi FRW 2,644,74,2007 ndetse aborozi bo akaba ari FRW 2,267,157,536 . Leta y'u Rwanda imaze kwunganira abahinzi kugira ngo babone ubwishingizi amafaranga angana na FRW 3,818,591,369.2.