Kuri uyu wa gatandatu tariki ya 21/04/2018, ku rwibutso rwa Jenoside yakorewe Abatutsi mu 1994 ruherereye mu mudugudu wa Rebero, Akagari ka Mwulire ho mu murenge wa Mwulire; habereye umuhango wo kwibuka abikorera bishwe muri Jenoside. Iki gikorwa kikaba cyarateguwe n’abagize urugaga rw’abikorera mu ntara y’iburasirazuba.

 

Guverineri Mufulukye Fred wari wifatanyije n’abikorera muri uyu muhango, yihanganishije abacitse ku icumu rya Jenoside yakorewe Abatutsi, anabashimira abutwari bagize biyubaka ndetse bakanubaka igihugu. Guverineri Mufulukye yasabye abitabiriye uyu muhango ko buri wese agomba kurwanya ikintu icyo aricyo cyose cyaza kigamije kongera gutanya Abanyarwanda. Mu gusoza, Guverineri Mufulukye yashimiye abikorera bose muri rusange ku uruhare rukomeye bagira mu kubaka igihugu no kugiteza imbere.

 

Bwana  Gishoma Eric, Umuyobozi wungirije w’urugaga rw’abikorera  ku rwego rw'igihugu, nawe yashimiye abikorera kuba barateguye kandi bakitabira uyu muhango wo kwibuka bagenzi babo bazize Jenoside yakorewe Abatutsi mu 1994 ndetse anashimira ingabo zari iza FPR Inkotanyi zari ziyobowe na Perezida Kagame, ku uburyo zitanze zitizigama zigahagarika Jenoside. Bwana  Gishoma  yanashimiye Leta y’u Rwanda, uburyo iha agaciro gakomeye abikorera bityo nabo bakabona uko bakora imirimo yabo bisanzuye kandi bafite umutekano usesuye.

 

Nyuma yo kunamira Abatutsi bishwe muri Jenoside bashyinguye mu rwibutso rwa Jenoside rwa Mwulire,  Abikorera bameye kuzagira uruhare mu mirimo yo kurusana. Mu gusoza iki gikorwa, Abikorera baremeye Mukankunsi Alivera, wacitse ku icumu rya Jenoside yakorewe Abatutsi, bakaba bamuhaye inka ya kijyambere.  Uyu muhango wari witabiriwe kandi n’abahagarariye inzego z’umutekano mu ntara y’Iburasirazuba, Abagize Komite nyobozi y’Akarere ka Rwamagana n’ubuyobozi bwa Ibuka mu karere ka Rwamagana.