Kuri uyu wa 19Ukuboza 2025 mu Mudugudu wa Kayibanda ho mu Kagari ka Rugarama,Nzige hatashywe ku mugaragaro Urugo mbonezamikurire y'abana bato(ECD) rufite ibyumba 4 n'igikoni, rwubatswe ku bufatanye n'Itorero EPR n'Umuryango Help a Child, rukaba rwakira abana 120, mu mushinga Turakura Kids Rwanda.

Umuyobozi w'Akarere wungirije ushinzwe imibereho myiza Mme Umutoni Jeanne yashimiye Itorero rya EPR n'abafatanyabikorwa ku ruhare bagira mu gushyigikira gahunda mbonezamukurire y'abana bato, yibutsa ababyeyi n'abarezi kwita kuri iyi ECD no guha abana uburere buboneye bityo nibakura neza babe ingirakamaro ku muryango n'Igihugu.

Muri uyu mwaka wa 2025/2026 ku bufatanye n'Itorero EPR mu Karere hubatswe ingo mbonezamikurire y'abana bato (ECD centers) zigera kuri eshatu (3) hanasanwa urundi rumwe (1). Kugeza ubu mu Karere hamaze kubakwa ingo mbonezamikurire y'abana bato (ECD Centres) zigera kuri magana arindwi (700) zirera abana bato 36,644 buri mwaka zikaba ziyongera ku ngo mbonezamikurire zo mu ngo (Home-based ECD) ziri hirya no hino mu midugudu.