Ku gicamunsi cyo kuri uyu wa kane tariki ya 19/04/2018, mu bitaro bya Rwamagana habereye umuhango wo kwibuka ku nshuro ya 24 Abari Abakozi b’ibitaro bya Rwamagana n’ibigo by’ubuvuzi bibishamikiyeho, Abarwayi bari babirwariyemo ndetse n’abarwaza babo bishwe muri Jenoside yakorewe Abatutsi muri Mata 1994. Kuri iyi nshuro, Muri ibi bitaro hakaba harubatswe n’ikimenyetso kigaragaza amateka ya Jenoside yakorewe Abatutsi mu 1994, ndetse hanandikwaho amwe mu mazina y’inzirakarengane zishwe icyo yabashije kumenyekana. Abayobozi b’Akarere ka Rwamagana bari kumwe n’abahagarariye inzego z’umutekano zikorera muri aka karere, Abahagarariye komisiyo yo kurwanya Jenoside ndetse na IBUKA nabo bakaba bitabiriye uyu muhango.

 

Mu buhamya bwatanzwe na Mbanda Gerard wacitse ku icumu rya Jenoside yakorewe Abatutsi mu 1994 arokokeye mu kigo nderabuzima cya Muyumbu yagaragaje ubunyamaswa bukabije yakorewe n’interahamwe ndetse ashimira n’ingabo zari iza FPR Inkotanyi zamutabaye zikamurokora, zikamuvuza kugeza n’aho zimujyana kuvurizwa mu Butaliyani kandi zari zikirwana n’urugamba rwo kubora igihugu no guhagarika Jenoside yari igikorwa.

 

Dr  Muhire Philbert uyobora ibitaro bya Rwamagana yavuze ko nk’ubuyobozi n’abakozi b’ibitaro ndetse n’ibindi bigo bibishamikiyeho baha agaciro umwanya wo kwibuka abishwe muri Jenoside yakorewe Abatutsi mu 1994 kuko Jenoside yadutwaye abaganga bari bafite ubushobozi bwo gutanga ubuzima, itwara abarwayi bari bagannye ibitari n’ibigo by’ubuzuzi bahizeye ubuzima birangira bahiciwe ndetse ntiyasiga n’abarwaza bari babarwaje. Dr  Muhire Philbert yanenze bikomeye kuba mu bakoze Jenoside harimo n’abari abavuzi bari bafite inshingano yo gutanga ubuzima ahubwo bikarangira babuvukije abo bari bashinzwe ku buha.

 

Umuyobozi wungije ushinzwe imibereho myiza mu karere karere ka Rwamagana, Madamu Umutoni Jeanne ari nawe wari umushyitsi mukuru muri uyu muhango, yashimiye ibitaro by’intara bya Rwamagana uburyo buri mwaka gigenda birusha gutegura neza umuhango wo kwibuka abishwe muri Jenoside yakorewe Abatutsi mu 1994. Aha, Visi Meya Umutoni Jeanne akaba yashimiye ubuyobozi bw’ibitaro kuba uyu mwaka bwarubatse mu bitaro ikimenyetso kigaragaza amateka ya Jenoside yakorewe Abatutsi. Madamu Umutoni Jeanne yasabye ababyeyi kuganiza abana ukuri ku mateka ya Jenoside yakorewe Abatutsi mu 1994 kandi bakabarinda ingengabitekerezo ya Jenoside, asaba abari aho bose kugira umutima wo gukunda igihugu ndetse n’uwo gukundana, kwegera abacitse ku icuma no kubahumuriza muri ibi bihe bitoroshye turimo. Mu gusoza, Visi Meya Umutoni Jeanne akaba yashimiye ubutwari n’ubwitange bw’ingabo zari iza FPR zitanze zitizigamye bityo hakagira abarokoka.