Kuri uyu wa gatatu tariki 13/06/2018, Guverineri w'intara y'iburasirazuba Mufulukye Fred ari kumwe n'umuyobozi wa Polisi y'u Rwanda ku rwego rw'igihugu IGP Emmanuel Gasana, abahagarariye ingabo ndetse na Meya Mbonyumuvunyi Radjab bitabiriye ibirori byo gutaha ku mugaragaro ibiro by'umudugudu wa Rwamugurusu utaragaragawemo icyaha na kimwe muri uyu mwaka dusoza wa 2017/2018. Iyi nyubako y'ibiro by'uyu mudugudu wa Rwamugurusu yubatswe na Polisi y'igihugu, ikaba igizwe n'icyumba mberabyombi ( salle), ibyumba 2 by'ibiro (bureaux) ndetse n'ubwiherero. Muri iyi nyubako hanashyizwemo ibikoresho byo mu biro birimo intebe n'ameza, imashini isohora inyandiko, imashini yandika (Laptop Computer), televisiyo, amashanyarazi akomoka ku mirasire y'izuba ndetse n'ubwiherero bwo hanze bufite ahagenewe abagabo n'ahagenewe abagore.

Meya Mbonyumuvunyi Radjab yashimiye Polisi y'igihugu kubera ibikorwa by'indashyikirwa byinshi Polisi igenda igeza ku baturage bo mu karere ka  Rwamagana harimo n'ibi biro by'umudugudu byatashywe ku mugaragaro. Meya Mbonyumuvunyi yanaboneyeho gushimira uburyo ishuli rya Polisi rya Gishali (PTS) rifatanya n'ubuyobozi bw'Akarere ka Rwamagana mu guteza imbere imibereho myiza y'abaturage.  Yasabye abaturage kurushaho kurwanyaibyaha, bakabungabunga umutekano kuko aribo inyungu zigarukaho.

IGP Emmanue Gasana yavuze ko imidugudu nk'iyi irimo kubakwa muri buri karere, aho umudugudu utarangwamo icyaha muri buri karere yubakiwe ibiro, ndetse n'abaturage bawutuye bagahabwa amashanyarazi ava ku mirasire y'izuba. IGP Emmanuel Gasana yibukije abaturage ko iyo ushaka umutekano ugomba kuwuha mugenzi wawe. Ibi bakabikora bita ku bintu 3 aribyo: Kurinda, Kurindwa no kwirinda.

Guverineri Mufulukye wari umushyitsi mukuru muri ibi birori nawe yashimiye Polisi y'igihugu ndetse asaba abaturage gukomeza ingamba zo kurwanya ibyaha. Guverineri Mufulukye yibukije abaturage ko imikoranire myiza iri hagati y'inzego z'umutekano n'abaturage ikomoka ku miyoborere myiza twagejejweho na Perezida Kagame. Yasabye abatura gukomeza kubungabunga umutekano cyane cyane uw'imibereho myiza yabo, bakagira isuku, bagashyira abana bose mu ishuli, bakabungabunga ibyagezweho, babane amahoro mu miryango yabo, ... kuko aribwo bazaba barinze igihango bafitanye na Perezida Kagame ndetse n'inzego z'umutekano.

Umudugudu wa Rwamugurusu wubakiwe ibiro bishya, utuwe imiryango 176 irimo abaturage 417, ukaba uherereye mu kagari ka Bwana ho mu murenge wa Munyiginya.