Kuri uyu wa kane tariki ya 10/05/2018, mu cyumba mberabyombi cya AVEGA- Rwamagana habereye ihuriro ry’urubyiruko ruturutse mu mirenge n’utugari bigize Akarere ka Rwamagana, aho baganirijwe kuri gahunda ya “Ndi Umunyarwanda”.  Umunyamabanga nshingwabikorwa w’intara y’iburasirazuba, Bwana Habimana Kizito, ari kumwe n’abagize komite nyobozi y’Akarere, Abagize inama Njyanama y'Akarere ndetse n’abahagarariye inzego z’umutekano zikorera muri aka karere bakaba bifatanyije n’uru rubyiruko muri iri huriro.

Mu buhamya bwatanzwe n’umusaza w’umurinzi w’igihango witwa Nkurikiyinka Gedeon wacitse ku icumu rwa Jenoside yakorewe Abatutsi mu 1994  arokowe n’ingabo zari iza FPR Inkotanyi, yabwiye uru rubyiruko ko nubwo Interahamwe zari zaramusize wenyine, zaramusahuye ibintu byose ntizigire icyo zimusigira; yatanze imbabazi ku bamuhemukiye, baba abagize ubutwari bwo kuzimusaba ndetse n’abatarazimusabye. Muzehe Nkurikiyinka Gedeon yasabye urubyiruko guharanira gukora ibyiza ndetse no kurwanya ingengabitekerezo ya Jenoside. 

Visi Meya Umutoni Jeanne yibukije urubyiruko ko rugomba gufatanya kubaka igihugu rugakora urunana ntawe usigaye. Nyuama yo kubagaragariza ko Jenoside yakozwe n’urubyiruko rwigishijwe nabi ariko kandi igahagarikwa n’urubyiruko rwigishijwe gukunda ubuzima no kuburengera rwari mu ngabo zari iza FPR Inkotanyi, Visi Meya Umutoni Jeanne yasabye urubyiruko ko bose bagomba gufatanyiriza hamwe mu kubaka igihugu, abafite ababyeyi bakibaswe n’ikibi bakabigisha bagahinduka bakwanga bakitandukanya n’ikibi kibarimo. 

Mu kiganiro kijyanye na gahunda ya “Ndi Umunyarwanda” cyatanzwe n’umunyamabanga nshingwabikorwa w’intara y’iburasirazuba, Bwana Habimana Kizito yasabye uru rubyiruko kuba ipfundo rihuza ahahise n’ahazaza h’igihugu cyacu kandi bakabikora bagamije kubaka u Rwanda rubereye buri muturage. Bwana Habimana Kizito yabwiye uru rubyiruko ko rugomba kumva ko aribo “Rwanda” kuko igihugu gishingiye ku rubyiruko mbere na mbere dore ko arirwo ruba rufite inshingano zo guharanira kurinda ubusugire bwacyo no kugiteza imbere. Nyuma yo kubagaragariza ko n'ubwo abakoloni babibye amacakubiri banyarwanda bikageza u Rwanda kuri Jenoside yakorewe Abatutsi mu 1994 ariko mbere y'ubukoloni Abanyarwanda bahoze bunze ubumwe bafashanya muri byose ndetse n’igihugu cyaterwa bagatabarira hamwe, Bwana Habimana Kizito yasabye urubyiruko ko rugomba guharanira ubumwe bw’Abanyarwanda mbere y’ibindi byose, bakirinda ibigamije kubatanya, bagashyira imbere ibihuza Abanyarwanda. Mu gusoza, Bwana Habimana Kizito yasabye urubyiruko kwigira ku mateka yaranze igihugu, ntibirare ahubwo bagafasha ubuyobozi muri gahunda nziza yo kubaka ubumwe bw’Abanyarwanda kuko “Ndi Umunyarwanda” ari izingiro ry’ubunyarwanda bwungukira Abanyarwanda bose.

Nyuma yo guha umwanya urubyiruko rugatanga ibitekerezo byafasha mu kubaka ubumwe bw’Abanyarwanda ndetse no gusubiza bimwe mu bibazo rwari rufite, Bwana Habimana Kizito yasabye urubyiruko kurangwa n’indangagaciro z’umuco nyarwanda, bagatanga amakuru afasha mu gukumira no kuburizamo ibyaha, bakagira uruhare mu gukemura ibibazo bibangamiye umuryango nyarwanda, bakaguka mu bitekerezo kandi bagakora cyane batinyuka gushora imari, bakagira umuco wo kwizigamira, bakirinda ubusinzi no kwaya ndetse bagakorera hamwe mu makoperative.