Kuri uyu wa mbere tariki ya 04/02/2019, Ubuyobozi bw’ikigo cy’igihugu gishinzwe guteza imbere ibikorwa by’iterambere mu nzego z’ibanze [Local Administrative Entities Development Agency(LODA)] n’abafatanyabikorwa bacyo [(Belgian Development Agency(Enabel), The Embassy of the Kingdom of the Netherlands to Rwanda, Kreditanstalt für Wiederaufbau (KFW)] baje kureba umusaruro wavuye mu bikorwa bateye inkunga byo mu karere ka Rwamagana. Aba bashyitsi bari barangajwe imbere na Bwana Ngendahimana Pascal ukuriye ishami ry’ibikorwa by’iterambere ry’ubukungu muri LODA. Bari bari ku mwe kandi na Bwana Uwumukiza Francois ukorera Ambassade y’Abaholandi mu Rwanda, Bwana Laurent Messian ukuriye Enabel Rwanda ndetse na Yves Tuyishime ukorera Ambasade y’Ubudage mu Rwanda.

Mu biganiro bagiranye n’ubuyobozi bw’Akarere ka Rwamagana, Meya Mbonyumuvunyi Radjab yabahaye ikaze ndetse anashimira ibihugu by’ubuholandi, ubudage n’ububiligi, ku mibanire myiza n’ubufatanye bifitanye n’igihugu cy’u Rwanda. 

Aba bashyitsi basuye ibikorwa by’iterambere bitandukanye birimo: umuyoboro w’amazi meza wa Gatare-Mabare-Byinza mu murenge wa Rubona. Uyu muyoboro wuzuye utwaye amafaranga y’u Rwanda angana na 712,587,558 Ukaba ugeza amazi meza ku bantu 8, 686. Basuye kandi ishuli ry’ubumenyi-ngiro n’imyuga (TVET) naryo ryubatswe mu murenge wa Rubona, rikaba ryaruzuye ritwaye amafaranga y’u Rwanda arenga miliyoni 140. Barimo kuryigamo. Basoreje ku muhanda w’amabuye ufite uburebure bwa 1,17 Km, uturuka kuri Sitation ya Merez mu mujyi wa Rwamagana- ugakomereza ku gakiririro ka Rwamagana ugatunguka ku kagari ka Cyanya. Umwihariko w’uyu muhanda, ukaba ari uko ufasha abanyabukorikori bakorera mu gakiriro kugeza ibyo bakoze ku isoko. Uyu muhanda ukaba waruzuye utwaye amafaranga arenga miliyoni 436