Kuri uyu wa kabiri tariki ya 29/01/2019, Umuvunyi mukuru Bwana Anastase Murekezi yatangije ku mugaragaro gahunda yateguwe n’urwego rw’umuvunyi  igamije kurwanya ruswa n’akarengane ndetse no gucyemura ibibazo bibishamikiyeho. Iki gikorwa kikaba cyabereye ku kibuga cya Polisi giherereye mu murenge wa Kigabiro. Muri iki gikorwa, Umuvunyi mukuru yateze amatwi Abaturage ndetse anabacyemurira ibibazo byabo bijyanye n'akarengane bari bafite. 

Mu ijambo ry’ikaze, Visi Meya Umutoni Jeanne yavuze ko ubuyobozi bw’Akarere ka Rwamagana Bwishimiye iyi gahunda yo kurwanya ruswa n'akarengane kuko ari imwe mu nkingi z'iterambere, agaragaza ko ntawabasha kwiteza imbere afite ikibazo cy'akarengane, kandi ko iyo Abaturage babonye ubutabera bituma babona umwanya wo gutekereza ku iterambere ku buryo bwihuse. Visi Meya Umutoni Jeanne yanavuze ko Iyi gahunda izakorerwa no muyindi mirenge 13 yo muri aka karere ka Rwamagana, yizeza ko ubuyobozi bw’Akarere buzakomeza kwegera Abaturage, bukabatega amatwi kandi bubafasha no gucyemura ibibazo bafite, bunabereka inzira ziboneye banyuramo kugira ngo ibibazo byabo bicyemuke vuba.

Umuvunyi mukuru Bwana Anastase Murekezi yavuze ko kugira ngo ruswa n'akarengane bicike bisaba ubufatanye bw'inzego z'ubuyobozi (abayobozi ubwabo) n'abaturage.Amakuru ku bibazo n'ibyaha (by'abafata ibiyobyabwenge,ababinywa,ababicuruza,abacuruza abantu),...Akagerera ku buyobozi ku gihe. Yashishikarije abaturage kujya bihutira gutanga Amakuru ku buyobozi mu gihe babonye cyangwa bumvise abavuga ugasanga harimo ingengabitekerezo ya Jenoside, abarangwa n'inzangano, abahuguza abandi, abayobozi barya ruswa, ... kuko iyo ibyaha bitamenyekanye bituma bikura bigahabwa intebe.Ugasanga umuntu urya ruswa agakira mu buryo budasanzwe,niwe ushimwa aho kugawa. Yasabye abaturage kujya bagaya abayobozi babi nkabo.yasabye abaturage kujya bacyemurira ibibazo mu miryango mbere na mbere, kuko arinaho umuntu agomba gutorezwa kubaka Ubumwe ,ubupfura, ubunyangamugayo kandi ari n'aho turerera abana bacu tubatoza kugira indangagaciro z'umunyarwanda. Asaba abaturage kureka kwikururira akarengane rimwe na rimwe gashingiye ku makimbirane yo mu miryango. Umuvunyi mukuru Bwana Anastase Murekezi yanasabye abaturage kumenya kubahiriza amasezerano bagiranye n'abandi, bakemera gushyira mu bikorwa ibyemezo by’inkiko kandi bakirinda guhora mu manza za ndanze zidashira. Aha ariko yanabibukije ko banafite uburenganzira bwo kujurira igihe cyose babonye ko barenganye. Yasabye ubuyobozi kujya buha abaturage ibisubizo by'ibibazo bitandukanye baba babugejeje kugira ngo imanza zibe nkeya.

Umuvunyi mukuru Bwana Anastase Murekezi afatanyije n'ubuyobozi bw'Akarere, abakozi b'inzu z'ubutabera (MAJ) ndetse n'inzego z'umutekano bakaba bakiriye ndetse banacyemura ibibazo abaturage bari bafite bijyanye n'akarengane.