Kuri uyu wa gatanu tariki ya 12/11/2021, Bwana Kakooza Henry-Umuyobozi w’agateganyo w’Akarere ka Rwamagana yakiriye abashyitsi baturutse muri Ambasade y’Ubuholandi mu Rwanda aribo: Dr Timmo Gaasbeek-Umunyamabanga wa mbere ushinzwe amazi n’ibidukikije(First secretary/Water and environment) ndetse na Ms Odilia Scholvinck akaba ari Umujyanama mu itegurwa rya politiki yo gukwirakwiza amazi meza(Water policy advisor). Aba bashyitsi bari bari kumwe n’abakozi b’ikigo cy’igihugu gishinzwe gukwirakwiza ibikorwaremezo by’amazi meza, isuku n’isukura (WASAC), abakozi b’umuryango w’Abadage wita ku bikorwa byo gukwirakwiza amazi meza (VEI), ndetse n’abakozi b’umuryango mpuzamahanga ugamije guhindura ubuzima bw’abatuye mu bihugu bikiri mu nzira y’iterambere(WaterAid).

Uru ruzinduko rukaba rwari rugamije kureba umusaruro ukomoka ku bigega byo munsi y’ubutaka (underground water tanks) byubatswe ku bigo by’amashuri 6 aribyo: G.S Rutoma (Umurenge wa Musha), G.S Gati (Umurenge wa Gishari), G.S Muyumbu B (Umurenge wa Muyumbu), G.S Matyazo (Umurenge wa Nyakariro), G.S Rweri (Umurenge wa Gahengeri), na G.S Bujyujyu (Umurenge wa Muyumbu). Ibi bigega bikaba byarubatswe muri gahunda y’umushinga ugamije gukwirakwiza amazi meza mu buryo buhangana n’imihindagurikire y’igihe, kandi hibandwa ku mijyi mito(SCALE PROJECT). Uyu mushinga ushyirwa mu bikorwa ku bufatanye bwa Minisiteri y’ibikorwaremezo (MININFRA), Ikigo cy’igihugu gishinzwe gukwirakwiza ibikorwaremezo by’amazi meza, isuku n’isukura (WASAC), Umuryango w’Abadage wita ku bikorwa byo gukwirakwiza amazi meza (VEI), ndetse n’Umuryango mpuzamahanga ugamije guhindura ubuzima bw’abatuye mu bihugu bikiri mu nzira y’iterambere(WaterAid) ku nkunga y’Ikigo cy’Abaholandi(Netherlands Enterprise Agency)

Muri uru ruzinduko, aba bashyitsi basuye ikigo cya G.S Rutoma (Umurenge wa Musha) bareba uburyo ikigega cyahutswe cyagiriye umusaruro abanyeshuri bahiga by’umwihariko ndetse n’abaharerera muri rusange. Baganiriye n’ubuyobozi bw’ikigo ndetse na bamwe mu banyeshuri bahagarariye abandi, babahamiriza ko aya mazi yagize uruhare rukomeye mu kwimakaza isuku muri iki kigo. Aba bashyitsi basuye ibiro by’ikigo cy’igihugu gishinzwe gukwirakwiza ibikorwaremezo by’amazi meza, isuku n’isukura (WASAC)-Ishami rya Rwamagana baganira n’abakozi b’iki kigo ku bijyanye n’imikoranire ndetse n’ubufatanye hagati y’impande zombi.