Kuri uyu wa 26 Kamena 2025 Umuyobozi w'Akarere Bwana Mbonyumuvunyi Radjab ari kumwe na Perezida w'Ihuriro ry'Abafatanyabikorwa b'Akarere mu iterambere (JADF) yasoje imurikabikorwa ry'abagize Ihuriro ry'Abafatanyabikorwa b'Akarere mu iterambere,  ashimira abafatanyabikorwa ku gufatanya guteza imbere abaturage no kwesa imihigo.

Umuyobozi w'Akarere yashimiye abafatanyabikorwa ku ruhare bagize mu gufatanya n'Ubuyobozi bw'Akarere mu kubaka ibikorwaremezo bifitiye abaturage akamaro, gufasha abaturage guteza imbere ubuhinzi n'ubworozi no guteza imbere imibereho myiza, anabizeza ubufatanye no mu wundi mwaka. Muri uyu mwaka w'imihigo 2024/2025 urangiye, abafatanyabikorwa bagize uruhare mu gukemura ibibazo bibangamiye imibereho myiza y'abaturage harimo gutanga amabati yo gusakara inzu n'ubwiherero byubakiwe abatishoboye, kongera imiyoboro y'amazi no kuyegereza abaturage, kubaka amasoko mato 2 acuruza umusaruro w'abahinzi, kubaka ikigo cy'urubyiruko cya Mwulire, kubaka Isoko rya Rwamagana, kunganira muri gahunga ya Girinka, kongera imashini zipima ababyeyi batwite mu bigo nderabuzima bitandukanye n'ibindi bikorwa bitandukanye.

Perezida w'Ihuriro ry'Abafatanyabikorwa b'Akarere mu iterambere, Bwana Uwayezu Valens yavuze ko umwaka wa 2024/2025 urangiye hari byinshi bigezweho mu bufatanye n'Akarere, abafatanyabikorwa bakaba barunganiye ingengo y'imari y'Akarere n'ibikorwa bifite agaciro ka FRW 10,986,418,791. Muri uyu mwaka w'ingengo y'imari 2024/2025 abagize ihuriro JADF bari 79.