Mu gitondo cyo kuri uyu wa gatatu tariki ya 09/02/2022, Visi Meya Umutoni Jeanne ushinzwe iterambere ry’imibereho myiza yakiriye itsinda ry’abafatanyabikorwa baturutse mu miryango ibiri ya gikirisitu ariyo: Umuryango w’Abongereza witwa TEARFUND RWANDA n’Umuryango nyafurika w’ivugabutumwa (AEE RWANDA). Intego y’uruzinduko rwabo, ikaba kwari ukwigira ku Karere ka Rwamagana uburyo bateje imbere ibikorwa by’isuku n’isukura ku bufatanye na AEE RWANDA binyuze mu mushinga wa “Gikuriro”. Amasomo bigiye muri uru ruzinduko akaba azabafasha mu gushyira mu bikorwa ry’umushinga ugamije gukangurira abaturage kugira isuku binyuze mu kubashishikariza kugura ibikoresho by’isuku (Market based sanitation). Mu Rwanda, Uyu mushinga uzageragerezwa mu mirenge ya Kigabiro na Muhazi yo mu karere ka Rwamagana mu gihe cy’amezi cumi n’atanu(15) uhereye mu kwezi kwa Mutarama 2022; ukaba ubusanzwe TEARFUND yawukoreraga mu bihugu bya  Repubulika iharanira Demokarasi ya Congo na Sudani y’epfo.

Ku ruhande rwa  TEARFUND; iri tsinda ryari rirangajwe imbere n’Umwongerezakazi Rachel Stevens, Dada Luke na Waran Jimmy bo muri Sudani y’epfo, David Malimingi na Fabrice Kisaho bo muri Repubulika iharanira Demokarasi ya Congo ndetse na Olivier Bizimana umukozi wa TEARFUND RWANDA. Ku ruhande rwa  AEE RWANDA; hari Bwana Kabagamba Wilson uhuza ibikorwa by’umushinga ugamije gukangurira abaturage kugira isuku binyuze mu kubakangurira kugura ibikoresho by’isuku (Market based sanitation); Dusabe Jacky umujyanama muri AEE RWANDA, Gerard Nkerabahizi uhuza ibikorwa bya AEE mu karere ka Rwamagana ndetse na Musafiri Francois Xavier ushinzwe ishyirwa mu bikorwa mu bikorwa ry’uyu mushinga.
 
Nyuma yo kuganira n’ubuyobozi bw’Akarere ka Rwamagana, aba bafatanyabikorwa banasuye ikigo cy’isuku n’isukura - Akarere ka Rwamagana giherereye mu murenge wa Kigabiro kikaba gicuruza ibikoresho by’isuku. Basuye kandi Umurenge SACCO wa Kigabiro “IMBONI SACCO Kigabiro”, basobanurirwa uburyo abaturage boroherezwa kugura ibikoresho by’isuku ku nguzanyo bakgenda bishyura buhoro buhoro. Ku gicamunsi, aba bashyitsi basuye ibikorwa by’itsinda (club) ry’isuku ryitwa “TUNOZE ISUKU” rikorera mu mudugudu w’Urugwiro, Akagari ka Ntebe ho mu murenge wa Muhazi ndetse n’ibikorwa by’ihuriro (Club) ryitwa “ISOKO Y’UBUZIMA” rikorera mu mudugudu wa Gatika, Akagari ka Musha ho mu murenge wa Musha.